Философийн хүрээлэнгийн Улс төр, эрх зүйн салбарт хэрэгжиж буй ОХУ-ын Шинжлэх ухааны сан,  Монгол Улсын Шинжлэх ухаан технологийн сангийн  “Орос, Монголын уламжлалт буддизм, шашны дараах болон орчин үеийн нийгэм-улс төрийн үйл явц” сэдэвт хамтарсан төслийн хүрээнд “Орос, Монголын уламжлалт буддизм ба орчин үеийн нийгэм-улс төрийн үйл явц” сэдэвт онол, арга зүйн семинарыг 2024 оны 11 дүгээр сарын 04-ний өдөр зохион байгууллаа.

 

      

   Эрдэм шинжилгээний хэлэлцүүлэгт ОХУ-ын Буриад улсын Дорж Банзаровын нэрэмжит Буриадын улсын их сургуулийн төслийн багийн гишүүд болон Монгол Улсын талаас ШУА-ийн Философийн хүрээлэнгийн Улс төр, эрх зүй, шашин судлал, социологийн салбарын ЭША-ууд оролцсон.

 

 

        Дугуй ширээний ярилцлагад ОХУ-ын Буриад Улсын Дорж Банзаровын нэрэмжит Буриадын улсын их сургуулийн Улс төр, социологийн тэнхимийн эрхлэгч, социологийн ухааны доктор, дэд профессор,  нийгэм-улс төрийн судалгааны “Алтернатив” төвийн захирал Бадмацыренов Тимур Баторович “Орос, Монгол дахь шашны бус байдал, уламжлалт буддизм ба нийгэм-улс төрийн үйл явц: судалгааны үзэл баримтлал” сэдвээр, МУИС-ийн Философи, шашин судлалын тэнхимийн профессор С.Цэдэндамба “Орчин үеийн Монголын төр шашны харилцааны тогтолцоон дахь буддын шашин” сэдвээр, ОХУ-ын Санкт-Петербургийн Улсын Их Сургуулийн Социологийн онол, түүхийн тэнхимийн доктор, дэд профессор Островская Елена Александровна “Оросын нийгмийн олон нийтийн хүрээн дэх буддын шашны иргэний байгууллагууд” зэрэг сонирхолтой  илтгэлүүд хэлэлцэгдэв. Дугуй ширээний ярилцлагад буддизмын гадаад бодлого, буддизм нийгэмд ямар үүрэг гүйцэтгэж байгаа хүлээлт, буддизмын олон талт үйл ажиллагааны талаар нээлттэй ярилцлага өрнүүллээ.

 

           ОХУ-ын судлаачдын багт талархал илэрхийлж МУИС-ийн Философи, шашин судлалын тэнхимийн профессор С.Цэдэндамба ШУА-ийн Философийн хүрээлэнгийн шашин судлал салбарын бүтээлийн дээжээс өргөн барив.                                                                                                                                                                                                 Хамтарсан төсөл нь Монгол, Орос Улсын гадаад харилцаа, улс төр, олон нийтийн санаа бодол, цахим буддизмын нөлөөлөл чиглэлээр 2024-2026 онд хэрэгжих юм.

 

 

Мэдээ бэлтгэсэн: Улс төр, эрх зүйн салбарын магистр М.Долгорсүрэн