Нэрт Монгол судлаач Н.К.Рерихийн 150 жилийн ойд зориулсан “Рерих нар ба Монгол” олон улсын эрдэм шинжилгээний VI хурал 2024 оны 10-р сарын 28-30-ны өдрүүдэд Улаанбаатар хотод болж өнгөрлөө.

Энэ удаагийн хурлыг Улаанбаатар хот дахь Рерих нарын Шамбалын музей, ШУА-ийн Философийн хүрээлэн, Санкт-Петербург хот дахь Рерихийн гэр бүлийн хүрээлэн, Г.Занабазарын нэрэмжит Дүрслэх урлагийн музей хамтран зохион байгуулж, ОХУ-ын Эрмитаж музей, ОХУ-ын Дорно дахины урлагийн музей, Санкт-Петербургчуудын дэлхийн клуб, Монгол шуудан ХК, Рерихийн Ш.Бира сан, Олон улсын Рерихийн өв сан, Рерихийн үндэсний хороо дэмжин оролцлоо.

   10-р сарын 28-нд Дүрслэх урлагийн музейд Н.К.Рерихийн 150 жилийн ойд зориулсан шинэ марк, мөн “Монгол марк дахь Оросын сэдэв”, “Н.Рерих-гадаад орны марканд” хамтарсан үзэсгэлэнгийн нээлт боллоо. Бүх хуралдаан ШУА-ийн Философийн хүрээлэнгийн байранд болсон бөгөөд нэгдсэн хуралдаанаас гадна “Рерихийн Гэрээ – Соёлын хадгалалт – Олон улсын харилцаа”, “Рерихийн философи ба орчин үе”, “Шашин-Соёл: Эв нэгдлийн зохицол”, “Н.К.Рерихийн бүтээл туурвил: Дорно дахин судлал ба Монгол”, “Рерихийн сурган хүмүүжүүлэхүй ба нийгмийн ухамсар” сэдвийн дор 5 салбар хуралдаанд чиглэл чиглэлийн эрдэмтэн судлаачид 29 илтгэл тавьж хэлэлцүүлсэн юм. Мөн Рерихийн гэр бүлийн тухай “Соёлоор дамжих энх амгалан” кино фестиваль уг хурлын үйл ажиллагааны хүрээнд зохион байгуулагдлаа.