ШУА-ийн
Философийн хүрээлэнгийн Философийн салбарт 2017-2019 онд хэрэгжиж буй “Монгол
Улсын урт хугацааны хөгжлийн бодлогыг хэрэгжүүлэхэд нөлөөлөх субъектив хүчин
зүйлсийн шинжилгээ” суурь судалгааны төслийн хүрээнд “Монгол улсын хөгжил дэх мал аж ахуй, газар тариалан, аж үйлдвэр, уул
уурхайн зохистой хамаарлын тулгамдсан асуудлууд” сэдэвт эрдэм шинжилгээний
хэлэлцүүлгийг 2019 оны 06 дугаар сарын 24-нд зохион байгуулав.
Тус хэлэлцүүлгийг нээж төслийн удирдагч, академич
Г.Чулуунбаатар, доктор (Sc.D) Б.Даш-Ёндон хэлэлцүүлэгт зориулж үг хэлж, хэлэлцүүлгийн
үндсэн илтгэлийг доктор (Ph.D) Б.Батхишиг “Монголын мал аж
ахуй, газар тариалан, уул уурхай, боловсруулах аж үйлдвэрийн салбаруудын
зохистой хамаарал, харьцааны асуудал” сэдвээр бэлтгэж хэлэлцүүллээ.
Хэлэлцүүлэгт салбар салбарын олон эрдэмтэд оролцсоноос заримыг нь дурьдвал,
академич Т.Дорж, С.Нямзагд, ахмад эрдэмтэн, Хөдөлмөрийн баатар, доктор,
профессор Г.Очирбат, ахмад эрдэмтэн, доктор (Sc.D) Ц.Балхаажав, Ш.Батсүх, Ц.Сүхбаатар, Л.Дүгэржав, доктор (Ph.D) Р.Батмэнд, Л.Оюун, Д.Батмөнх, Ц.Сосорбарам, Б.Чинзориг нараас
гадна Философийн хүрээлэнгийн эрдэм шинжилгээний ажилтнууд оролцлоо.
Эрдэмтэд хэлэлцүүлгийн
сэдвийг ихэд сонирхож, хэлэлцүүлгээс гарах зөвлөмжид өөрсдийн санал, зөвлөмжөө
хэлж танилцуулсан. Эдгээрийг багцлан хэлбэл, энэ салбарууд нэгдмэл нэг байдлаар
засгийн нэгдлийг хангах хэрэгтэй, нарийвчлан, төрөлжиж хөгжих нь их чухал,
ялангуяа мал аж ахуй дээрээ түшиглэн хөгжих ёстой, эдийн засгийн ямар
тогтолцоогоор явах ёстой гэдгээ тодорхой болгож хөгжих нь чухал, төрөлжсөн (салбар бүр дээр) банктай болох хэрэгтэй, мал аж ахуйгаа хөгжүүлэхийн тулд
малчдыг бизнес сэтгэлгээтэй болгож, мал аж ахуйгаа эдийн засгийн эргэлтэнд
оруулах арга ухаанд суралцуулахад анхаарах хэрэгтэй, мөн малаа өсгөж хөгжлийн
суурь болгон хөгжүүлж бодлогоор зохицуулах хэрэгтэй, бэлчээрийн мал аж ахуй
дээр бусад бүх салбар нь уяж зангидагдан явах ёстой, ус бол бүх салбарыг холбох
чухал зүйл мөн гэх мэт олон чухал зөвлөмжийг танилцуулсан үр дүнтэй хэлэлцүүлэг
боллоо.
Хэлэлцүүлгээс гарах зөвлөмжөөс эдгээр болон бусад чухал
олон саналуудтай танилцах боломжтой.
Мэдээг бэлтгэсэн Б.Цэрмаа
2019 оны 6-р сарын 24.